تقاسيم شخصية لنماذج بشرية

Admin

1- الشخصية الصندوقية ....

ترجع هالتسمية للصندوق ...وكلنا نعرف إن الصندوق غالباً يكون بغطاء ..

ولما يتسكر الغطاء يكون من جوا مظلم ...صح ؟؟؟(اكيد يعني ولا فية صندوق جواتة لمبة ؟)

اصحاب هالشخصية ...غالبا متزمتون ...مايحبون احد يكشفهم ولا يكشف اسرارهم

حتى لو كانت تافهه ...متقولبون ...يعني واصلين حد معين من السعه وموقفين

مايستحملون التمدد والتوسع ...يكتفون بما لديهم من مساحه من كل شي

علم ...تطور ...كل شي ..زي الصندوق بالضبط ...يمتلي بأي شي (زين عاد ولا شين )

همن ماعاد يبقى فية مكان لشي زياده ...

وهم بنظري مدعاة للشفقه...

2- الشخصية الكبريتية ..

طبعاً عرفتوا أن التسمية جاءت نسبةً للكبريت ...وهم فئة من البشر

قابل للإشتعال في اي لحظة ...متى ماتعرض للإحتكاك ....ملتهب ..وإذا اشتعل أحرق الأخضر

واليابس ...وطلع الفضايح والأسرار ...(علي وعلى أعدائي ) ...

خصوصاً لو تقابل مع شخصية كبريتية زية ...فوقتها بيكون الدمار اشمل واعم ...

يعني لو عندك في العايلة ثنتين من ذوات هالشخصية ...وحبيتي يوم تعزمينهم

افضل مكان من وجهه نظري تعزمينهم فية هو ( البر ) ..

عشان لين احتكوا ببعض وقدحوا شرار ...تضفين قشك واغراضك وتناحشين وتخلينهم

في البر ...يحرقون بعض وماحولهم شي يحرقونة ...

3- الشخصية الصمغية ...

هي شخصية تشبة الصمغ ...ماخذة منة صفات التلزق والتصمغ ...وطبعاً ينقسمون

لبعض درجات ...زي درجات الصمغ ...صمغ ورق ...صمغ قزاز ...صمغ فيران ( يوووو )

يعني بعضهم شوي ممكن ينفكون عنك ..وبعضهم اللهم ياكافي ...لزقه مؤبدة ..

وهم اللي ماعندهم ادنى إعتبار للوقت (يسمعون فية بس مايدرون وشو )

...وهم غالبا يلبسون ساعات ماتشتغل

أو مايلبسون ابد ...

يعني مايهمهم وش انتي فية من وقت ولا من شغل ...خلاص طقت في بالهم يبون

يشغلون خاصية التصمغ يشغلونها ...بغض النظر عن التزاماتك ولا وقتك ..

4- الشخصية البالونية ..

هذي عاد اكرهها موت ...وهي اللي تكون زي البالون بالضبط ...منفوخ بس فاضي من جوا

إلا من الهواء ...

يعني تجيك تترزز عندك وهي تطالعك بربع عين ....ولما تجلس في مكان ..ياأرض أتهدي

ماعليك أددي ...وهي لو تناقشينها في شي ولا تسألينها عن شي طيرت عيونها

وقعدت تدور الترجمه في وجهك ...

5- الشخصية الكرتونية ...

هذي سميتها تسذا نسبةً لأفلام الكرتون ...وهم زيها بالضبط ...شخصيات هشة ...

يرسمها الآخرون ويحركونها على كيف كيفهم ...

وأمثالهم كثير للأسف ...وحتى لو كانو المحركين لها هم الأب ولا الام فانا ضدها بتاتاً البتة ..

6- الشخصية الريموتية ...

نسبتها (للريموت كونترول ) ..وهي عكس الكرتونية ..وهي شخصية كل وظيفتها بالحياة

إدارة شؤؤون وافكار الآخرين ...بالزين ولا بالشين المهم يديرون ويسكتون ويشغلون ...

وهذي متعتهم بالحياة ...

8-الشخصية الفسفورية ...

وهذي بعد من الشخصيات اللي اكرهها ...لأنها مؤذية ...وسميتها تسذا نسبةً للون

الفسفوري ..وهو اللي في النهار حليل وش حليلة خامد...وفي الظلام

يولع ..ويصير مؤذي ...وهو نوعية من البشر ...قدام الناس وفي النهار وش حليلها

مسالمة ...وخلف الأبواب ...تكون وجه آخر ...مولعه ...

9-الشخصية التسجيلية ...

هي عاد ياكثرها ....اللي تقعد جنبك وانتي تتكلمين مع احد ... وتسوي نفسها مهيب

معك ...وهي قالطة بكل جوارحها واذانها ومخها وكل شي ..

تسجل وش تقولين حرف حرف ...وغالبا مايصاحب هالشخصية حركات مدروسة

مثل اللعب في شعرها ولا فستانها ولا البحبشة في شنطتها ..

تسويها للتموية ...يعني اني منيب لمك ...

10- الشخصية الكربونية ...

هذي عاد ..من ربع القص واللصق ...كل شي في حياتهم استنساخ من الآخرين

ماعندهم نمط معين ولا فكر معين ...كل شي في حياتهم ...كربون من غيرهم

وأنا اعتبرهم مزيفيين ...وغالباً مايكونون غير راضين عن أنفسهم ..لكن يستمرون في

كربنتهم ...

شكرا على الموضوع